Om susupo sempat babaca berita soal ada barapa anggota dewan yang ba usul, supaya ini gajinya anggota dewan yang pamalas maso kantor, ditahan dulu atau jang dulu dikase. Om susupo kandati te talalo parcaya itu usulan mo jadi dibikin, cuma memang baharap, musti ada sanksi atau hukuman buat anggota dewan yang pamalas maso kantor.Noh bayangkan, dorang pe pandapatan di dewan so pe basaar skali. Di kampungnya om susupo saja, ada yang babilang so sampe 20 juta satu bulan. Ebee, kalu pandapatan so bagitu, memang so sanang skali itu hidup. Cuma so itu, kalu pandapatan yang dibayarnya daerah so pe basaar, ditambah deng perjalanan dinas yang juga dibayar akannya daerah, kon masih pamalas maso kantor, kan kasian ini rakyat deng daerah.
Om susupo sempat dengar, ada yang babilang, barangkali ada yang te maso-maso kantor karna dia lagi sibuk deng tugas luar, kon aspirasinya rakyat tatap dia perjuangkan. Ini yang om susupo te talalo stuju. Karna kalu maso kantor saja so pamalas, baru bagimana mo bakase sampe aspirasinya rakyat supaya jadi kaputusan. Kalu sibuk deng tugas luar, om susupo juga te talalo yakin. Karna kalu om susupo pasiar ka dewan, ada anggota dewan yang om susupo liat tatap rajin bakantor. Kalu dorang ada bajalan dinas, pe abis bajalan dinas, so maso-maso kantor lagi. Kalu di rapat-rapat, dorang juga rajin bacarita.
Tagal itu, om susupo mo baharap skali sama ini anggota dewan samua, coba kasian barajin-rajin maso kantor. Karna hele so rajin saja, blum tantu rajin bacarita di rapat-rapat kon bisa bakase sampe aspirasinya rakyat supaya jadi kaputusan, baru bagimana kalu pamalas maso kantor. Karna yang om susupo tau, buat bakase bajalan itu aspirasinya rakyat supaya jadi kaputusan, musti dibilang di dewan lewat rapat-rapat. Tagal itu, barajin-rajin maso kantor kasian, supaya rakyat yang bapilih te rugi, daerah yang babayar pandapatan juga te rugi, kon aspirasinya rakyat bisa dikase sampe di rapat-rapat...**
