Listrik oh listrik

Ini keluhan soal pelayanan listrik yang blum normal rupa te abis-abis. Noh bayangkan, amper hari-hari, ada orang mengeluh di media sosial, karna ada pemadaman.

Om susupo juga baca di koran, ini pengumuman mati listrik juga rupa te abis-abis. So barapa bulan ini, jadwal mati lampu masih tatap tatempel di koran. Yang bikin bingung, apa sebenarnya depe masalah, kon sampe skarang rupa ini torang pe pelayanan listrik tatap te normal.

Om susupo juga, mo bakase normal ini pelayanan bukan pakarjaan gampang, karna memang ini PLN balayani samua wilayah. Cuma kalu sampe babulan-bulan te normal, kon masih tatap ada jadwal mati lampu, ini tantu so talalo skali.

Noh skarang ini ada ujian nasional yang sementara diikotnya anak-anak SMK, baru abis itu anak-anak SMA deng Aliyah, kon lanjut lagi deng SMP, MTs. Memang listrik siang pas anak-anak ujian barangkali bisa dikase normal, cuma kan malam ini anak-anak skolah parlu balajar juga buat persiapan ujian. Noh kalu listrik mati, tantu baganggu persiapannya anak-anak yang mo ujian kasian.

Kon so te lama lagi, torang juga somo maso bulan puasa. Ini umat Islam somo bataraweh, makan sahur deng depe magrib babuka puasa. Bayangkan sandiri bagimana depe rasa, kalu pas taraweh atau makan sahur deng babuka puasa, kon mati lampu.

Tagal itu, om susupo baharap skali supaya ini PLN bisa bakase bae depe pelayanan, kon te ada lagi mati-mati lampu. Om susup tau, memang baraat balayani samua orang supaya sanang deng puas. Cuma so bagitu memang tanggung jawabnya PLN sebagai badan usahanya negara yang ba urus soal listrik. Mo suka te suka, listrik memang musti bagus, karna itu tanggung jawabnya PLN...**

Berenti bahoax

Ini suasana kehidupannya orang-orang kebanyakan om susupo liat ada normal. Dari pagi sampe malam, dorang pe kegiatan sama deng hari-hari laen, karna memang itu dorang pe karja buat mo bahasilkan doi yang dipake bakase hidup dorang pe kaluarga. Kalu ada suasana laen kon rupa ada depe tegang-tegang, itu cuma dirasanya barapa orang. Cuma yah, karna dorang yang barasa tegang ini mo suka supaya depe perasaan tegang tajangkit sama yang laen, akhirnya ada yang babacarita sagala rupa, deng harapan ini kebanyakan orang so baku-baku ikot tegang. Jang heran kalu muncul sagala rupa kabar te butul, atau orang-orang bilang hoax. Hoax ini memang depe arti kabar yang te butul, tapi dicarita kasana-kamari, depe tujuan supaya itu kabar orang parcaya, kon depe lanjutan banyak orang jadi kalangkabut.

Noh skarang ini, babikin deng bakase sebar kabar hoax ini kan rupa gampang, karna depe modal cuma hape, kon ada akun media sosial. Di media sosial itu akhirnya muncul sagala rupa carita, termasuk carita yang te butul. Noh blum lama ini kan ada kabar soal itu surat suara pemilihan umum yang sodicoblos, padahal itu kabar te butul. Noh bagimana mo dicoblos, hele depe surat suara blum dicetak. Muncul lagi kabar soal itu rumah sakit yang so te balayani pasien deng kartu BPJS kesehatan. Padahal yang butul, Kementerian Kesehatan yang bacabut status kelayakannya atau akreditasnya rumah sakit, kon deng bagitu BPJS te mo bakerjasama deng rumah sakit yang te terakreditasi. Cuma ini diputar depe carita, dibikin rupa ini pasien BPJS yang so te dilayaninya rumah sakit.

Bukan cuma hoax di pusat, hoax di daerah sampe di kampung-kampung juga biasa muncul, rupa soal utang daerah yang basaar skali, ada doi daerah yang te cair, sampe ada kelompok yang te jelas, so bajanji soal tunjangan kinerja yang pagawe negeri punya mo dikase nae. Noh om susupo yang bukan pagawe saja sampe heran, so bagimana depe carita, kalu bukan pagawe, bukan pajabat, bukan tukang urus kebijakan daerah, kon so babahas deng babilang mo bakase nae tunjangan kinerjanya pagawe negeri. Yah, om susupo cuma bisa basapu dada, mudah-mudahan torang samua yang pake akal sehat, te langsung maen parcaya, karna skarang ini memang lagi depe musim. Cuma buat torang yang ada sehat-sehat pikiran, yah te usah baku ikot babagi itu kabar hoax, kabar yang te jelas depe sumber, deng kabar yang cuma dibikin-bikinnya orang sambarangan...**

Doi makan minum

Om susupo dengar-dengar dari pembahasan APBD yang blum kalar-kalaar, ini torang pe wakil rakyat so bapangkas-pangkas barapa anggaran, rupa buat organisasi pemuda. Yah, om susupo cuma bapikir, depe nama saja dewan, dorang kan memang ada hak buat atur anggaran yang dibilang-bilang hak budget.

Sebagai rakyat biasa yang te ada hak-hak apa-apa buat ba atur anggaran, om susupo hanya bapikir, kalu so tapangkas anggaran, kan gampang depe urusan, te usah talalo banyak babikin kegiatan. Depe doi sadikit, yah depe kegiatan tantu sadikit, atau kalu parlu te usah bikin apa-apa.

Cuma om susupo juga mo baku kase ingat sama ini torang pe wakil rakyat, yah kalu bapangkas program, mustinya yang duluan dipotong-potong itu balanja makan minum yang selama ini pe banak skali, termasuk makan minum di dewan. Noh bayangkan, hari-hari ada tasadia depe dos kukis, kandati te ada kegiatan, kon kandati ini anggota dewan te maso-maso kantor. Bagitu juga doi makan minum di pamarentah yang juga banyak, ini yang barangkali bisa dikase-kase kurang.

Doi rakyat laen yang bisa dihemat, itu yang biasa tapake buat bajalan dinas, mo bajalan dinasnya pamarentah atau bajalan dinasnya anggota dewan. Karna biasa, ada yang bajalan dinas sampe barombongan, padahal yang laen te ditau apa depe fungsi. Macam kunjungan kerjanya wakil rakyat ka kota-kota laen, banyak yang te tau apa depe guna buat daerah. Baru yang paling penting, kalu babajalan dinas, yah te usahmo talalo banyak depe personil, so rupa mo pigi bahadang musuh di perbatasan negara. Kalu memang yang bisa bacarita cuma dua tiga orang, kanapa mustinya pigi banyak orang, sampe yang te tau bacarita di rapat-rapat so baku-baku ikot. Baru abis bajalan dinas, mustinya ada depe laporan, apa-apa yang diurus, kon apa-apa depe hasil, baru apa depe guna buat daerah itu bajalan dinas. Ini kalu butul-butul mo bahemat.

Jang sampe, orang jadi curiga, bapotong-potong anggaran cuma karna sakit hati atau ada takait deng urusan persaingan politik di pemilu. Karna skarang ini, samua memang jadi politis, hele babili sendo deng porok buat di dapur, so musti hati-hati, karna bisa jadi masalah kalu depe warna te cocok deng urusan warna politik...**

Jang cuma minta maaf

Om susupo rupa so barapa kali baliat postingannya orang di media sosial soal kasus bakase rusak taman, mulai dari yang bakase rusak kursi taman, bacuri bunga sampe bakase picah pot bunga. Noh ini yang bakase picah pot bunga di taman-taman sama torang pe kota, sampe so kaliatan di rekaman CCTV kon akhirnya orang posting di media sosial.

Depe garaap, sarta tatangkap di kamera CCTV kon orang posting-posting di media sosial, depe pelaku akhirnya badatangi kantornya pamarentah, kon abis itu cuma baminta maaf, babikin surat pernyataan, kon babilang depe alasan te sangaja. Padahal, kalu baliat itu rekaman-rekamannya CCTV yang orang posting di media sosial, ada yang rupa sangaja, karna dorang pe model dorang tare itu pot, kon akhirnya picah. Noh so tau itu pot bunga ada babadiri gagah, kanapa juga kon musti disontong-sontong atau dipindah-pindah, baru sarta picah ba alasan te sangaja.

Yah, minta maaf itu so butul. Babikin surat pernyataan supaya te ba ulang depe kalakuan juga butul. Cuma kalu samua mo dikase biar bagitu, samua mo dianggap te sangaja, kon samua cukup baminta maaf, yah akhirnya deng enteng orang baku ikot bakase rusak taman, karna dorang so tau, depe ujung cukup babilang minta maaf deng babikin surat pernyataan, kon ba alasan te sangaja. Om susupo pikir, kalu cara baselesaikan kasus bakase rusak taman memang cuma bagini, yah jang kase salah orang kalu akhirnya ada yang baku-baku ikot itu kalakuan.

Orang akhirnya te takut bakase rusak taman atau depe sarana yang dibikin pake doi rakyat. Ingat akan kasian, itu taman dibikin pake doi rakyat. Kalu taman yang dibikin sandiri, rupa itu orang punya di ujung kota sana, om susupo te mo baku kase pusing, karna yang rugi bukan doi rakyat. Cuma kalu taman yang dibikin pake doi rakyat, kon depe tujuan buat bakase gagah kota, baru sambarangan dikase rusak, kan itu sama saja bakase rugi rakyat. Tagal itu, kalu ada yang bakase rusak lagi, jang cuma abis diminta maaf. Paling kurang suruh dorang baganti dua kali lipat, supaya dorang tau itu kalakuan te beres, kon orang juga te mo baku ikot yang babagitu...**

Jang pesimis

Taon 2018 torang so kase tinggal, kon skarang so maso taon 2019. Yah, biar masih ada yang bacarita kalu depe utang taon 2018 blum lunas, cuma bukan berarti taon 2019 mo dihadapi deng suram. Tatap musti ada rasa optimis, karna so optimis itu yang bikin torang smangat. Om susupo saja yang masih ada utang, tatap te pesimis. Karna buat mo bakase lunas utang sisa taon lalu, te bisa pesimis.

Memang ada yang bahadapi taon 2019 ini deng cukup baraat, rupa itu yang babacaleg atau bacalon presiden, termasuk depe tim sukses. Noh bayangkan, skarang ini om susupo liat samua masin politik sopanas skali, sampe samua hal rupa so diliat pake kacamata politik. Mulai bamakan, bamandi, basambayang, basumbang, pasiar, baliat daerah bencana atau bacarita apa saja, sopake kacamata politik.

Cuma kalu om susupo liat, itu depe tanda samua ada bagaraak deng bapikir supaya ini torang pe keadaan bisa lebeh bagus. Kan kalu pesimis, tantu pikiran so te berkembang, kon hari-hari cuma bapeto orang, bakase salah orang, baru bacarita rupa ini torang pe negara somo punah.

Tagal itu, om susupo bakase ingat, supaya taon 2019 ini musti torang hadapi deng smangat, deng optimis, deng bangkit sama-sama, karna mo bakase maju torang pe negara deng torang pe daerah, musti sama-sama, te boleh sasandiri. Kalu sasandiri, yah depe jadi pesimis turuus, kon tiap baliat apa yang orang bikin, salalu curiga, salalu bakase salah orang.

Ingat, dunia te selebar daon kelor. Tagal itu, ini hidup musti optimis. Kalu blum berhasil di satu bidang, coba liat-liat bidang laen. Kalu ada yang te bagus, mari torang baku kase ingat supaya dikase bae. Memang te gampang, cuma kalu torang samua baku-baku tolong, baku-baku sayang, baku-baku kerja sama, pasti ini torang pe negara deng daerah bisa lebeh bae. Kon buat bakase bae ini keadaan, samua parlu optimis, bukan bapiara pesimisme, apalagi cuma bapiara sikap yang hari-hari bapeto deng bakase salah orang atau bakase salah negeri sandiri. Mari torang hadapi ini 2019 deng bagarak sama-sama, bukan sasandiri ...**

Jang ada miras

Om susupo liat diberita, so ada penegasannya torang pe bupati, supaya jang ada minuman karaas (miras) di malam taon baru nanti. Yah, om susupo pikir, ini surat edaran yang bupati kase kaluar so butul. Noh ini miras pe akibat kan memang banyak, mulai dari pamabo yang akhirnya bacarita sagala rupa, kon bisa babikin baku tasalah deng yang laen, pamabo yang jadi pangtensi, karna hele dapat senggol sadikit, so langsung emosi kon so suka baku pukul, atau pamabo yang kasana-kamari deng motor atau oto, kon akhirnya basenggol orang laen, atau dorang pe cara babawa kandaraan so te tertib. Apalagi kalu so malam taon baru, ini yang pamabo juga somo baku kase liat gaya, termasuk baku tanding sapa yang paling banyak minum miras. Noh bagitu so mabo-mabo, akhirnya biasa so ada yang bakacau. Tagal itu, miras memang musti dilarang, apalagi di malam yang banyak skali orang kasana-kamari. Buat ini patugas polisi deng pol pp, yah kase tegas juga sama ini panjual deng yang babili. Jang kase ampun sama dorang yang bajual, supaya dorang bisa tobat. Kan samua juga so tau, ini miras atau minuman yang ba alkohol, salalu bikin depe tukang minum ilang kontrol, jadi rupa barani skali, kon itu yang bikin masalah. Kalu memang ini patugas mo kase tertib, yah kase tertib butul, jang ada yang dikase kesempatan, supaya te ada yang minum miras di malam taon baru, kalu parlu deng malam-malam seterusnya. Kon buat ini yang babikin kegiatan atau acara, jang ada yang basadia-sadia akan minuman karaas, supaya te ada yang kalangkabut kon akhirnya bikin baribut. Lebeh bagus lagi, kalu acara yang dibikin takait deng kegiatan agama, supaya malam taon baru jadi malam buat bakase bae diri, buat ba instrospeksi diri deng malam buat bakase bae tali silaturahmi, bukan malam bebas bamabo...**

Om Susupo: Baku Hargai..

Skarang ini, torang pe sudara-sudara yang agama Nasrani ada sementara barayakan hari raya Natal. Om susupo juga mo ba ucapkan selamat buat yang barayakan.

Yah, ini torang pe daerah kan memang depe suku deng agama ada macam-macam. Ada yang Islam, ada yang Nasrani, Hindu deng Budha atau Konghucu. Biar torang beda-beda agama, tapi torang musti baku-baku sayang, baku jaga deng baku hargai, karna so itu yang bikin torang kuat, bikin torang maju deng bikin torang tatap aman.

Noh bayangkan, ada sudara-sudara di daerah laen atau negara laen yang kasian, hele mo balanja, mo skolah stau mo mancari so kalangkabut, karna baku-baku musuh, baku-baku kase rusak, kon akhirnya ancor sama-sama. Karna yang depe nama baku musuh deng bakalai, yang menang jadi abu, yang kalah jadi arang, sama-sama ancor.

Tagal itu, om susupo mo baku-baku kase ingat sama torang samua termasuk om susupo deng om susupo pe sudara-sudara, supaya mari torang baku-baku hargai deng baku jaga. Te usah baku-baku fitnah, baku carita yang jelek, kon ba anggap paling butul sandiri. Karna dipikirannya om susupo, urusan agama bukan cuma urusan pande bacarita agama atau pande ibadah, tapi juga musti kaliatan di kalakuan hari-hari. Noh orang yang butul-butul ba agama, kan te baku kase rusak, te baku fitnah deng te baku kase ancor.

Kalu so takait deng soal ibadah, mari torang baku hargai saja, karna masing-masing agama ada depe keyakinan soal ajaran yang butul. Cuma yang om susupo yakin, samua agama pasti ba ajar baku-baku sayang, baku jaga deng baku tolong. Te ada agama yang ba ajar buat baku kase rusak atau baku fitnah deng baku kase ancor. Kalu ada orang yang bagitu depe model, parcaya saja, itu bukan depe agama yang salah, tapi depe pikiran yang salah. Jadi lebeh bae kase sehat pikiran, kon ikot ajaran agama masing-masing, baru kase liat itu sikap deng kalakuan yang bae...**

Awasi samua...

Te dirasa ini somo maso ujungnya taon. Yah, berarti ini pakarjaan-pakarjaan yang pake doi rakyat so musti beres. Cuma om susupo dengar-dengar, masih ada pakarjaan yang tagantong, masih banyak yang blum tabikin, kon amper pasti te mo kalaar sampe tutup taon.

Om susupo pikir, so di sini barangkali pakarjaannya torang pe wakil rakyat buat ba awasi, karna dorang itu kan memang digaji basaar-basaar skali, buat ba awasi ini program yang dibikin pake doi rakyat.

Cuma om susupo sandiri macam ragu sama torang pe wakil, karna hele pakarjaan yang ada di sampingnya dorang, te mampu dorang awasi, mo apalagi yang so jaoh-jaoh. Noh bayangkan, ada bangunan yang baku samping deng wakil rakyat pe tampat bacarita, kon itu bangunan juga buat dorang, cuma rupa te mo selesai sampai tutup taon. Cuma so itu, om susupo blum tau, apa itu wakil rakyat pernah bapangge depe dinas deng depe kontraktor atau tidak. Padahal mustinya, itu pakarjaan yang ada sama dorang pe mata, duluan dorang pareksa, kon kalu parlu so dipangge depe dinas deng depe tukang karja dari jaoh-jaoh hari.

Tagal itu, om susupo bapikir, barangkali samua musti rakyat awasi, termasuk torang pe wakil rakyat. Yah macam dorang pe bajalan dinas, kira-kira buat apa, barapa banyak, barapa kali dorang ka kota-kota laen, barapa doi yang abis, kon apa depe hasil buat torang pe daerah dari dorang bajalan-jalan dinas itu. Blum lagi barapa dorang pe produk rupa perda yang jadi, kon bagimana deng urusan dorang pe kehadiran di dewan.

Om susupo bapikir, mustinya ini karjanya pamarentah diawasinya wakil rakyat. Cuma kalu so urusan kehadiran saja so te mampu dorang awasi, baru bagimana mo ba awasi program yang dibikin pake doi rakyat kon depe lokasi jaoh skali. Akhirnya om susupo jadi batanya dalam hati, baru buat apa dorang torang pilih kon kase duduk di dewan, kalu baru urusan hadir saja so bikin pusing. Padahal masih ada urusan barani bacarita di rapat-rapat resmi yang mustinya lebeh bikin pusing rakyat yang so bapilih...**

Alergi

Om susupo pe pikiran akhir-akhir ini sadikit kacau, babadengar soal kajadian yang kana sama taman-taman wartawan. Yah, sebagai orang yang baku dekat skali deng taman-taman wartawan, om susupo prihatin, karna so jaman moderen bagini, masih banyak yang rupa alergi deng wartawan. Padahal, wartawan pe tugas itu cuma tukang kase kabar kajadian, tukang bagi informasi resmi, supaya banyak orang bisa tau.

Barapa waktu lalu, om susupo sempat badengar kabar soal itu orang hebat yang rupa so bacarita te sadaap tentang wartawan, cuma gara-gara ada kajadian yang dihadirinya itu orang hebat, te diliput besar-besaran. Kalu om susupo liat, itu kajadian so diliput, cuma memang kalu so urusan mo jadi berita basar sama depe media, so urusannya redaksi masing-masing. Mo sapapun te bisa bacampuri itu urusan.

Yang bikin om susupo heran, itu orang hebat yang bamarah sama wartawan, cuma undangan, kon rupa so dia pe acara. Blum lama abis itu, itu orang hebat ada lagi basindir-sindir wartawan deng sagala rupa bahasa yang te sadaap. Ini kajadian yang bagini bukan pertama. Karna so barapa kali ada kajadian yang bikin pakarjaannya wartawan taganggu, rupa yang blum lama ini diberitakannya koran di kampungnya om susupo.

Om susupo cuma mo baku kase ingat sama samua orang. Itu wartawan pe pakarjaan bacari berita atau informasi, kon bakase kabar sama samua orang. Urusan kalu ada media yang te disuka, sebenarnya gampang, berenti nonton depe siaran tv atau berenti babaca depe koran. Te usah pake bapeto sagala rupa, persis so sempurna skali.

Om susupo cuma takut, kalu kabiasaan babagini turus ada, noh ini model yang macam dulu-dulu, yang pang tersinggung sama wartawan atau media, rupa somo muncul lagi, kon abis itu somo muncul aturan mo babredel media. Coba kasian, kalu pang tensi lebeh bae pigi karja apa saja, asal jang yang baku muka deng orang banyak. Karna kalu karja yang takait deng orang banyak, pasti ada-ada saja depe kabar yang orang parlu tau. Kalu mo suka hebat, tapi wartawan te suka korek-korek depe kehebatan, yah pigi di tengah hutan belantara yang te ada orang laen, kan gampang...**

Te sehat

Om susupo makin bingung ini model bacaritanya orang tertentu di media sosial, karna ada yang rupa koslet depe otak. Macam soal kasusnya Ratna Sarumpaet yang mangaku dianiaya, blum tau apa-apa depe carita yang sebenarnya, blum dengar depe kajadian lengkap, so main bilang sambarangan depe kelompok yang diduga pelaku, kon depe ujung-ujung takait politik. Depe garaap, pas ternyata itu Ratna Sarumpaet balekos, ini yang baposting sambarangan te minta maaf, kon ba ilang plan-plan, ba anggap te ada apa-apa. Ada juga yang baposting kon batanya soal silsilah kaluarganya presiden, padahal di wikipedia lengkap. Mustinya kan, kalu memang pande, kalu memang pake hape paling canggih, yah coba cari di google, pasti kaluar depe penjelasan resmi. Te mungkin presiden yang so jadi kapala negara, baru depe silsilah te jelas. Abis itu, ada lagi soal kotak suara dari bahan kardus yang te tembus aer. Dicarita sagala rupa, kon sampe babilang ada tim pemenangan yang batolak. Padahal itu kardus so disetujuinya dewan pusat, kon ini kelompok yang basoroti justru paling banyak depe anggota di komisi yang babahas itu soal pemilu.

Yah, om susupo cuma mo bakase saran, supaya coba kalu te sehat pikiran, te sehat urusan rumah tangga, te sehat urusan balanja rumah tangga karna mo suka boros tapi pandapatan kacili, jang bacarita politik kasian. Lebeh bae, kase sehat-sehat dulu badan, kase sehat pikiran, kase bae cara ba atur pandapatan deng balanja rumah tangga, baru bacarita urusan laen, supaya te tacako. Jang urusan bamasak sayor yang takurang depe garam karna kios te bakase utang garam deng pitsin, baru somo bacarita politik, somo bakase salah urusan demokrasi, somo ba anggap samua orang salah. Yah, lebeh bae, kalu memang badan te sehat, pikiran te sehat, balanja rumah tangga apalagi, coba jual saja itu hape canggih, supaya bisa dipake buat babantu-bantu urusan balanja di dapur.

Jang torang pe diri yang kacau karna torang pe salah sandiri, baru mo baku kase salah samua orang. Torang yang pamalas, kon akhirnya pandapatan kacili, jang bakase salah orang laen. Torang yang lebeh banyak santai, baru mo bakase salah orang laen yang rajin. Inta bajalan-jalan ka kilo lima atau Lalong, kon baliat pemandangan gagah, supaya sehat otak deng badan, baru abis itu kase rajin bakarja kasian, kon jang lupa berdoa sama Tuhan, supaya ini hidup jadi bae ...**

Jadi bahan politik

Ini taon politik memang luar biasa. Pokoknya apa-apa bisa jadi bahan politik kon dipolitisasi, mulai dari baju, cara bapakean, logat atau dialek, datang atau te datang di pesta, urusan babahas doinya rakyat, sampe urusan kotak suara. Yah memang ada urusan yang takait deng acara politik, cuma kalu om susupo pikir, te samua juga bisa dipolitisisasi. Rupa urusan kotak suara, memang dibikin buat kegiatan politik, cuma kalu somo dipolitisasi, blum apa-apa so baku tuduh kemungkinan curang atau sagala rupa anggapan, om susupo rasa so talalo juga.

Depe garaap, banyak yang te tau apa-apa, blum tau apa-apa, sama skali te ada pengetahuan, tapi so rupa kaliatan dia paling pande. Yah, rupa itu urusan kotak suara.

Padahal sarta om susupo babaca berita di media resmi, ow ternyata ini kaputusan soal babikin kotak suara yang bukan dari bahan almanium, sodisetujuinya anggota dewan dari samua fraksi. Ini berarti, so itu partai politik juga yang babikin kaputusan. Cuma yah, karna memang te ada bahan carita, te ada bahan kampanye, akhirnya biar yang blum ditau skali, so dibilang sagala rupa.

Rupa kamarin soal itu aturan pakean buat pagawe negeri. Om susupo babaliat, pe banyak skali yang bukan pagawe negeri yang baribut, kon samua rupa so dikase kait deng urusan moral, agama atau sagala rupa yang laen, pokoknya supaya kaliatan ada bahan bastatus di media sosial atau baku hantam di media. Ada yang om susupo rasa te sadar, babacarita soal hal bae supaya dibilang-bilang bae, padahal kalakuan blum tantu bae. Tagal itu, om susupo cuma baku kase saran, jang juga karna taon politik, baru samua somo dipolitisasi. Coba kalu memang pande, lebeh bae kase kaluar kamari carita soal depe calon pe hebat, depe calon pe program, bukan tentang orang laen pe salah, apalagi cuma carita dikarang-karang alias hoax.

Kalu cuma pande mo baku karang carita, lebeh bae babikin novel atau cerpen, baru cetak, kon jual supaya badapat doi. Daripada cuma babikin carita lekos, depe jadi yang didapat cuma dosa, kon somo dianggap pangbalekos...**

Kase jelas depe hasil

Om susupo sempat baliat ada postingan di media sosial soal pernyataan menteri keuangan yang basoroti perjalanan dinas di pamarentahan daerah. Yah memang ini bajalan dinas rupa anggaran yang bebas pake, padahal mustinya ada depe aturan. Bukan babatasi, cuma tantu parlu diatur, supaya jang asal suka pigi, langsung pigi. Kalu mo pake doi sandiri te ada masalah, cuma ini kan kasian doinya rakyat, doi negara.

Om susupo pikir, memang ini soal bajalan dinas parlu dikase bae, supaya jang mentang-mentang pajabat, jang mentang-mentang ada kadudukan di pamarentah atau di dewan, baru rupa bebas skali pigi. Memang, itu doi bajalan dinas diteru di anggaran daerah, buat badukung tugas-tugasnya pamarentah termasuk anggota dewan. Cuma so itu, jang karna depe doi ada, baru main asal pigi mo kegiatan apa saja.

Kalu dipikirannya om susupo, mustinya ada depe kejelasan soal hasil dari bajalan dinas. Kan kalu ada kegiatan, musti ada depe target, apalagi ini doi rakyat yang dipake. Hele pake doi sandiri mo ka pasar, pasti ada depe target, supaya pulang dari pasar ada depe hasil. Apalagi doi daerah, tantu musti ada depe target apa, kon bagimana depe hasil, supaya itu bajalan dinas butul-butul ada depe guna, bukan cuma jadi alat buat mo pigi-pigi ka kotanya orang, padahal barangkali cuma mo bahadiri kegiatan yang te ada kaitan deng torang.

Kalu bisa juga, ini bajalan dinas dibatasi depe jumlah tiap kegiatan. Rupa kalu ada pajabat batarima penghargaan, atau anggota dewan mo ada konsultasi, yah te usah juga samua pigi. Memang doi bajalan dinas itu ada tasadia, cuma kan mustinya ada depe ukuran efisien. Kalu urusan yang bisa cuma satu atau dua orang, kanapa kon musti satu regu pigi, so rupa kelompok yang mo pigi vokal group. Kan lebeh bae pigi barapa orang saja, supaya bisa bahemat doi daerah. Baru abis itu bajalan dinas, jang cuma urusan tanggung jawab administrasi, tapi mustinya diminta depe hasil atau depe laporan yang bisa samua orang liat, karna itu doi yang dipake kan doi rakyat atau doi negara, bukan doi pribadi. Kalu ada depe laporan hasil, kan abis itu samua orang juga bisa batanya depe sambungan deng kapantingannya rakyat atau daerah. Ini kalu memang ada niat mo kase bae daerah, supaya jang muncul sagala rupa anggapan yang kalangkabut...**

Jang kotor pikiran

Kandati depe persiapan te lama, ini Hari Nusantara yang dibikin sama om susupo pe kampung akhirnya sukses. Noh bayangkan, om susupo yang kamarin juga ada ka Tangkiang, baliat sandiri itu manusia pe banyak skali. Yah, om susupo te jago soal bahitung jumlah orang, cuma kalu mo dibilang ribuan, memang ada barapa ribu yang hadir. Hele om susupo mo baku cari tampat parkir motor saja so pe susah, kon akhirya badapat tampat yang so pe jaoh skali dari tampat acara.

Yah, om susupo tantu sanang, karna ini acara sukses deng lancar, kandati ada barapa orang yang sagala rupa depe carita, mulai batolak orang modatang di kampungnya om susupo, sampe bacarita sagala rupa yang so kalangkabut. Buat om susupo, te ada masalah kalu yang depe pikiran kalangkabut, cuma jang juga talalo kotor pikiran, baru somo bakase kait samua. Karna ada yang om susupo liat, rupa buta sejarah, sampe te tau apa itu Hari Nusantara, baru depe garaap babikin carita sasandiri. Padahal sarta om susupo badengar apa itu menteri bilang kamarin, ternyata ini Hari Nusantara dibikin buat baperingati itu Deklarasi Juanda. Itu deklarasi tahun 1957 bakase tegas, kalu Indonesia berdaulat di lautnya Indonesia. Laut dibilang bukan pemisah, tapi so itu yang jadi pemersatunya Indonesia. Sampe ada yang bilang, ini Deklarasi Juanda sama deng deklarasi kemerdekaannya Indonesia yang kadua, karna so bakase satu samua wilayah yang tapisah laut, jadi satu Indonesia.

Tagal itu, om susupo bakase ingat sama yang talalo kalangkabut atau depe pikiran barangkali te bersih, jang babikin penafsiran sandiri soal itu kegiatan Hari Nusantara. Apalagi kalu om susupo liat, itu hari buat bakase liat kalu torang pe TNI Angkatan Laut hebat deng kuat, buat bajaga ini lautnya Indonesia. Yah, buat yang depe pikiran masih kalangkabut, depe sederhana, kalu memang cinta Indonesia, cukup jang bakase kotor laut, jang babuang sampah di laut, jang babuang puntung rokok di laut, deng jang babunuh diri di laut kasian. Mari jaga torang pe laut, karna dari laut banyak orang hidup, makan deng badapat penghasilan buat dorang pe masa depan. Yang masih bakase kotor laut, om susupo rasa, berarti depe pikiran juga kotor...**

Blum tertib

Om susupo pernah babaca koran, ada yang babilang itu panjual yang babajual di pinggir jalan di kompleknya pasar, mo dikase tertib. Cuma kalu om susupo liat-liat, rupa sampe kamarin masih tatap ada. Itu yang babajual masih bapake jalan kandati cuma pake tikar buat depe tampat bajual.
Yah, om susupo cuma mo baku kase ingat ulang sama ini patugasnya pamarentah, supaya jang cuma abis direncana. Memang babilang rencana mo bakase tertin itu gampang, cuma so itu, depe babikin yang kadang pe susah skali.

Urusan mo bakase tertib itu tampat bajual, memang penting skali, supaya jang sotalanjur ini panjual baku ikot babajual di pinggir jalan, baru akhirnya bikin repot. Karna kalu so makin banyak, so tambah susah mo bakase tertib. Noh bayangkan, hele masih sadikit saja so baganggu jalan deng jambatan yang mo dipakenya kandaraan, apalagi kalu so banyak skali. Skarang saja, oto-oto basaar akhirnya te bisa balewat di komplek jalan pante dekat pasar, karna so banyak yang babajual di pinggir jalan, kon ada juga yang babikin parkiran. Padahal itu jalan dibikin buat jalur alternatifnya kandaraan dari satu kalurahan mo ka kalurahan laen.

Tagal itu, kalu memang pamarentah mo bakase tertib, yah te usah talalo banyak direncana, tapi langsung turun kon kase tertib, karna itu jalan memang bukan buat tampat bajual. Bagitu juga deng jambatan, ada yang so pake buat tampat bajual, kon ada juga yang pake buat baparkir. Depe jadi, itu jalan jadi sempit. Ini yang om susupo pikir, parlu capaat diurusnya patugasnya pamarentah, supaya jang nanti talanjur jadi banyak karna orang so baku-baku ikot, baru mo kalangkabut.  Ini penertiban juga tinggal urusan mo dibikin atau te dibikin, karna itu yang babajual sebenarnya so tau, itu jalan deng jambatan bukan tampat bajual. Cuma karna rupa dikase-kase biar, akhirnya yang sampe skarang jalan deng jambatan tatap ada pake buat bajual deng baparkir...**

Baku hargai

Om susupo suka itu himbauannya katua MUI Banggai yang bapasan supaya sama-sama bajaga suasana torang pe daerah yang skarang ini tatap aman. Salah satunya dia bilang, torang juga musti baku hargai deng perayaan hari besarnya agama, termasuk hari besarnya torang pe sudara yang beda agama.

Yah, apa yang dia pasan memang bagus skali, supaya usahanya orang yang mo baku kase picah torang pe persatuan, te berhasil. Karna ada yang cuma karna persoalan laen-laen, macam soal mo baku rampas kadudukan, so bawa-bawa soal urusan akhirat. Depe jadi, akhirnya ada sudara-sudara yang bisa tersinggung.

Tagal itu, torang memang musti lebeh dewasa basikapi sagala rupa. Apalagi skarang ini, ini media sosial so sagala rupa muncul. Hele orang yang depe karja ada bakase nasehat sambil bamarah-marah so ada, kon ada yang suka model bagitu. Padahal om susupo masih yakin, ini ajaran agama musti dibawa deng santun, bae-bae, deng perbuatan nyata di lapangan yang depe inti baku-baku bantu, bukan bamarah-marah orang laen.

Soal ini hari besar masing-masing agama, depe urusan kan sederhana, torang baku hargai. Torang bebas barayakan torang pe hari besar deng aman, kon yang laen juga tantu musti bagitu. Te usah baku ganggu, apalagi so baku-baku bilang sagala rupa. Bagitu juga kalu ada yang mo baku pasiar akan atau mo baku kase ucapan selamat, yah itu biarjo jadi urusan masing-masing, te usah talalo mo baku paksa sikap, supaya te jadi carita sagala rupa. Pokoknya depe inti, macam yang katua MUI bilang, torang baku-baku hargai saja, karna perbedaan bukan berarti putus silaturahmi...**

Tukang awasi bagimana ?

Om susupo sempat babaliat, so maso ujung taon ini, rupa masih ada barapa pakarjaan yang pake doi daerah yang talambat depe pakarjaan kon rupa te mo kalaar. Noh te salah-salah, ada pakarjaan yang depe doi tabilang basaar, karna babunyi miliar.

Om susupo yang cuma orang biasa-biasa juga bingung, kinapa kon sampe ada pakarjaan te selesai, padahal somo maso ujung taon. Yah, kalu macam orang yang babikin rumah kon depe jadi lambat, paling depe alasan soal doi yang blum cukup, tagal itu dibikin palan-palaan sesuai deng doi yang ada. Cuma kalu proyeknya pamarentah yang pake doi rakyat, kan so talalo juga kalo te cukup doi, karna depe doi so tateru sadaap di dokumen anggaran pembangunan.

Ada yang babilang sama om susupo, kadang juga karna ada takait deng soal cuaca, jadi ada pakarjaan yang talambat, rupa ujan yang turun te berenti-berenti. Kalu ini depe alasan maso akal. Cuma kalu macam di kampungnya om susupo, yang depe ujan cuma satu-satu kali, tantu bikin pusing bacari alasan laen.

Cuma memang om susupo bingung juga, bagimana ini depe dinas atau panitia yang batentukan tukang karja, kon sampe badapat tukang karja yang te beres, dapat tukang karja yang lambat. Depe garaap lagi, bagimana ini deng tukang awasi pakarjaan yang pake doi daerah, rupa ini wakil rakyat di dewan atau depe dinas teknis. Kan mustinya dari awal so ada pengawasan, supaya dapat liat depe kemajuan pakarjaan. Cuma ini lagi yang om susupo heran akan, kamana ini kasian wakil rakyat pe pengawasan, kon sampe so maso-maso ujung taon, baru hele usaha bapangge depe dinas, te dibikin. Hele pakarjaan yang ada di matanya itu wakil rakyat saja ada talambat jaoh, kon rupa cuma dikase-kase biar. Padahal, mustinya ini wakil rakyat baku bantu ba awasi, kalu parlu deng ganas, supaya ini kontraktor jang babarmain, jang babalambat, kon kalu memang te mampu, dari jaoh-jaoh hari so babilang te mampu. Cuma kalu nanti so di ujungnya taon bagini, biarle mo pake ilmu teknis paling hebat, tatap rupa susah kasian mo kase selesai pakarjaan sesuai depe batas waktu. Tagal itu, pengawasannya samua, mulai dari dinas, konsultan deng wakil rakyat, mustinya dibikin mulai dari pertama, supaya ini kontraktor te babalambat kasian...**

Jang abis direncana

Om susupo baca di koran kamarin, ini pamarentah mo rencana batertibkan itu pinggir jalan di komplek pasar yang depe bangunan baru abis dibongkar satu bulan lalu, kon skarang ini orang so ba alas akan buat tampat bajual.  Om susupo memang liat, itu pinggirnya jalan sblah pante, orang so pake-pake bajualan lagi. Memang dorang te babikin bangunan kayu macam dulu, cuma tatap juga itu jalan masih tampat bajual, karna skarang dorang so ba alas akan.

Ini kalu dikase biar, lama-lama samua baku ikot, kon orang yang bajual di dalam pasar, somo baku ikot kaluar juga supaya bisa bajual di pinggir jalan. Ini pembeli juga akhirnya so main parki sambarang depe kandaraan, karna so langsung babili di pinggir jalan.

Om susupo rasa, ini pamarentah memang musti tegas. Kalu tampat yang te bisa dipake buat bajual, karna buat oto deng motor lewat, yah te boleh dipake bajualan. Te boleh juga alasan mancari mo dipake, karna mancari juga parlu baku ikot aturan. Jang sampe, bangunan pasar yang dibikin mahal-mahal te ta isi, karna depe panjual so baku rebe kaluar bajual di pinggir jalan.

Cuma om susupo juga bakase saran, supaya ini pamarentah jang abis direncana. Kan mustinya ini batertibkan jalan so satu paket dari dulu waktu babongkar bangunan. Karna yang dilarang itu bapake trotoar atau pinggir jalan buat tampat bajual. Cuma om susupo liat ada yang rupa dikase biar. Mustinya, waktu baru satu-satu yang bapake pinggir jalan buat bajualan, so langsung dilarang deng disuruh bapindah. Kalu parlu paksa dorang kaluar. Cuma karna dikase biar, akhirnya yang laen so baku-baku ikot. Tagal itu, kalu memang pamarentah mo bakase tertib, yang jang abis direncana lagi. Musti capaat, supaya jang ada lagi alasan-alasan sagala rupa. Kalu so lebeh lama, akhirnya orang rame-rame baku ikot balanggar aturan...**

Te usah baper

Om susupo salut deng aksi kelompok massa di Jakarta yang akhirnya bajalan damai. Yah, om susupo pikir, ini juga karna pamarentah badukung itu kegiatan, te ada larangan babikin kegiatan, apalagi kalu depe isi memang buat kegiatan agama. Cuma om susupo juga sadikit bingung, karna ada yang so bacarita sagala rupa, sampe seolah-olah so bakase gambaran soal sapa yang mo jadi presiden akan datang, cuma karna baliat itu aksi di Jakarta.
Yah, om susupo sebenarnya te mo baku ikot campur deng itu urusan aksi, karna om susupo lebeh sibuk deng urusan buat bakarja. Cuma karna ada sagala rupa komen di media sosial yang rupa so talalo jaoh, om susupo rasa parlu baku kase saran, supaya samua te usah talalo tabawa perasaan atau anak-anak skarang bilang baper.

Buat om susupo, yang penting itu kegiatan so bajalan deng aman baru lancar. Depe peserta juga ada datang deng tujuan bae. Cuma memang, ada yang rupa talalo kalangkabut, karna so baku kase kait deng urusan pemilihan presiden. Padahal, urusan pemilihan presiden itu depe panitia atau tukang bikin KPU, kon depe waktu bapilih masih lama, masih ampat bulan lebeh lagi. Kan baru mo bapilih tanggal 17 April taon depan.
Tagal itu, te usah talalo bapikir, bagitu baliat itu aksi, turus so ba anggap so ada calon yang menang atau ada calon yang kalah. Yah bukan apa-apa, ini pilpres yang masih lama, lebeh bae diisinya rakyat deng bakarja, karna urusan bapilih nanti bulan April taon depan, bukan skarang. Kalu memang mo baku ukur kemungkinan menang deng kalah, ada depe saluran, survei yang pake ilmu, bukan cuma dibilang-bilang te ditau bagimana depe cara.

Buat ini om susupo pe sudara-sudara, om susupo cuma  mo baku kase ingat, lebeh bae baku jaga silaturahmi, te usah baku klaim pro atau te pro agama, karna yang mo dipilih ini bukan pemimpinnya agama, tapi pemimpinnnya samua rakyat, pemimpinnya negara. Noh daripada talalo baper deng urusan politik, lebeh bae torang kase sibuk diri deng bakarja, supaya ada penghasilan, kon bisa bakase hidup kaluarga. Mosia utus? sumo aijo kira-kira toh...**

Jang baku paksa

Om susupo liat, so dekat-dekat pemilu bagini, ini suasana memang rupa tatambah panas. Apalagi karna ini pemilu tasatu deng pemilihan presiden, kon depe calon sama deng calon yang lima taon lalu, ada Jokowi deng ada Prabowo.

Yah, om susupo bapikir, ini pemilu deng pemilihan presiden, mo bagimanapun depe panas, te boleh sampe babikin torang picah-picah. Ini pemilihan presiden juga bukan mo bapilih pemimpinnya agama, tapi bapilih torang pe pimpinan negara, pimpinan buat samua umat, samua suku, samua agama, samua daerah, pokoknya buat samua orang Indonesia. Tagal itu, om susupo baharap supaya jang ada sifat baku paksa pilihan, jang ada pikiran ba anggap paling benar, apalagi kalu so sampe baku kase kafir. Noh samua yang bacalon presiden, kan orang Indonesia yang ada depe agama. Tagal itu, urusan mo bapilih musti takait deng urusan mo babangun Indonesia, urusan mo ba urus samua rakyat, bukan cuma mo ba urus satu kelompok.

Buat om susupo, mo sapapun yang tapalih nanti, so dia itu torang pe pimpinan, yang musti torang dengar. Sama deng yang lima taon lalu, karna Jokowi yang menang, yah dia torang pe presiden. Kalu nanti Jokowi menang lagi, berarti dia presiden buat torang samua. Bagitu juga kalu Prabowo menang, berarti dia presiden buat torang samua.

Skarang ini, karna pemilihan juga masih barapa bulan lagi, lebeh bae torang sibuk bakarja samua, daripada mo baku kase panas turuus, kon akhirnya baku tasalah, bakalai baru so te baku-baku togoor. Padahal ini pemilihan presiden hanya urusan mo bapilih pimpinan negara. Lebeh bae, torang santai saja, te usah baku paksa pandapat, kon tinggal tunggu depe hari H tanggal 17 April 2019, baru torang coblos sapa yang torang suka, enteng kan ?...**

Patugas parlu tegas

Barapa hari ini, om susupo ada  balewat di pasar. Yah, kalu diliat-liat, so lumayan bagus depe jalur kandaraan, karna itu kios-kios yang babadiri di pinggir jalan pante so dibongkar samua. Bagitu juga deng itu kios-kios yang badiri di jalur dua, so abis dibongkar. Akhirnya kandaraan so mulai lancar lewat di pasar, karna jalan yang dulu jadi tampat bajual, so bale ulang jadi jalan.

Cuma kalu om susupo liat, tatap masih ada panjual deng tukang parkir yang bapake jalan buat dorang pe usaha. Macam di komplek jambatan deng jalan pinggir pante, masih ada panjual yang babajual. Memang dorang te tatap, karna ada yang pake oto, pake motor, atau ada yang cuma pake ember. Dorang pikir gampang bapindah atau gampang diangkat kalu patugas so larang. Cuma karna dorang bapake jalan, biasa juga masih babikin arusnya kandaraan taganggu.

Ini yang om susupo liat, masih parlu dikase tegasnya patugas. Patugas yang ada di pasar, musti tegas, kalu jalan yah jang ada lagi panjual yang bajual di situ. Bagitu juga deng tukang parkir, musti ba atur kandaraan supaya butul-butul di pinggir, bukan bapake badan jalan. Karna kalu yang babagitu te dikase tegas, lama-lama akhirnya ada yang baku-baku ikot bajual ulang di pinggir jalan.

Mo ba atur panjual di pasar memang parlu tegas, cuma bukan kasar. Tatap pake himbauan, cuma musti dijaga, musti dipareksa tiap saat, supaya jang ada panjual yang bale-bale ulang bajual di pinggir jalan, kandati cuma pake ember atau ba alas. Macam yang bajual ikan, musti dikase tegas supaya maso bajual di losnya pasar ikan. Bagitu juga deng sayor, musti dikase tegas, supaya dorang bajual di losnya sayor.

Ini panjual deng tukang parkir memang musti dikase ingat turuus, supaya dorang jadi tertib. Kan bukan mo balarang bajual, tapi bajual memang parlu tertib, parlu dikase sesuai deng depe tampat. Karna bajual juga te boleh sambarangan tampat, supaya jang babikin panjual yang so tertib, baprotes atau baku ikot bajual di pinggir jalan.

Cuma kalu om susupo liat, depe kunci sebenarnya sama ini patugas, supaya dorang tegas, kon sarta so dikase tertib, musti turus dijaga, supaya jang ada panjual yang bale-bale ulang ka pinggir jalan. Bagitu juga deng ini tampat parkir, musti diatur dimana-mana itu tampat parkir yang resmi, supaya te samua tampat boleh dipake buat tampat baparkir oto deng motor...**