Om susupo baca di koran-koran kamarin, torang pe daerah ini so badapat lagi predikat wajar tanpa pengecualian atau WTP buat laporan keuangan taon 2017 lalu. Yah ini tantu bagus, karna torang pe laporan pengelolaan keuangan gagah, kon bisa jelas depe pertanggungjawaban. Apalagi, ini torang pe daerah so sampe anam kali batarima itu opini WTP dari BPK, berarti tiap taon torang daerah pe laporan pengelolaan keuangan memang bagus skali. Om susupo pikir, itu tantu luar biasa, karna torang pe daerah bisa bapertanggungjawabkan urusan administrasinya keuangan daerah.
Cuma om susupo juga parlu kase ingat, supaya jang cuma depe laporan yang gagah, tapi depe hasil pakarjaan juga musti gagah. Jang sampe, depe laporan keuangan badapat nilai bagus, cuma depe karja di lapangan te sama deng itu. Karna om susupo sandiri masih babadengar, ada pakarjaan yang te talalo gagah, sampe ada yang pernah om susupo baca, depe hasil te bisa dirasanya rakyat. Macam itu proyek aer bersih di Masama yang dibangun berturut-turut taon 2016 deng 2017, ebee kasian sampe skarang ini depe aer te kaluar dari karaan.
Yah, kalu cuma memang mo babikin atau bapasang depe pipa deng meteran sampe karaan, yah jang dulu dibilang proyek aer bersih. Karna dipikirannya om susupo yang skolah kede-kede ini, kalu proyek aer bersih, berarti ada depe aer bersih yang bisa orang rasa, bisa orang pake buat kaparluan di rumah.
Tagal itu, om susupo baharap skali, supaya kalu depe laporan pengelolaan keuangan gagah, depe hasil karja juga musti gagah, supaya rakyat bisa rasa deng bisa pake depe hasil kasian...**
