Om susupo pernah baca di koran, itu Menteri Pemberdayaan Aparatur Negara Asman Abnur blum lama ini babilang, pamarentah so kase kaluar surat edaran supaya kandaraan dinas macam oto dinas, supaya te dipake mudik atau pulang kampung hari raya. Itu surat edaran, menteri bilang buat baganti surat edaran taon lalu, yang masih bakase boleh bapake kandaraan dinas, asal depe bensin deng perawatan kalu maso bengkel, ditanggung sandiri. Haa, ini edaran yang baru, om susupo rasa so butul skali, karna kandaraan dinas memang depe urusan dinas, dipake buat kapantingannya negara atau daerah, bukan kapantingan mo papasiar ka kampung, bajalan-jalan sama kaluarga, tetangga deng tamaan. Karna om susupo selama ini baliat, rupa ini kandaraan dinas, terutama oto dinas, rupa so tasalah pake. Ada yang te ada halaman rumah, tatap bapaksa babawa kandaraan dinas, kon akhirnya oto dinas tajemur-jemur di pinggir jalan. Sama skali te ada dorang pe hati deng otak bapikir akan, kalu itu oto dinas dibili pake doi rakyat, bukan pake doi dari hasil sandiri. Ada juga yang dulu, pas hari raya, so pigi bagaya pake oto dinas ka kampung, kon akhirnya dipake babagaya pasiar sama tamaan, kaluarga, deng tetangga. Te tau apa di otaknya dorang, kon oto dinas yang dibili pake doi rakyat, baru mo dipake bagaya.
Cuma om susupo juga mo kase ingat, supaya ini pajabat penting di pamarentah daerah macam bupati atau wakil bupati, bakase liat contoh, kon awasi itu anak buah, supaya jang sampe itu surat edaran, hanya abis di edaran. Om susupo yakin, rakyat bukan tereng baliat ini oto dinas dipake bagayanya pajabat atau pagawe negeri pas hari raya, tapi so muntah, karna baliat yang bapake rupa te tau diri. Ingat kasian, oto dinas, bukan oto pribadi. Tagal itu, sadar diri deng malu kasian...**
Om susupo
