Ini hari-hari somo dekat hari raya, om susupo liat-liat ini barapa kabutuhan pokok somulai bagaraak nae. Yah, memang karna kabutuhannya orang so banyak, depe jadi memang harga nae.Cuma om susupo juga baharap, ini panjual, mulai dari depe distributor sampe tukang jual eceran, jang juga talalo bakase barmain harga. Kalu kira-kira te parlu nae, yah te usah juga baku ikot nae. Ingat akan juga kasian orang-orang miskin yang parlu babalanja. Karna yang datang balanja, te samua badapat THR, te samua ada doi lebeh. Ada yang kasian te badapat tambahan pandapatan, ada yang te badapat THR, kon ada yang justru depe pandapatan turun.
Buat ini pamarentah, tolong liat-liat akan juga harga barang, supaya orang-orang miskin yang te badapat tambahan pandapatan, tatap bisa babalanja dorang pe kaparluan. Yah, termasuk soal ini gas elpiji 3 kilo yang depe tabung warna ijo macam kalapa muda. Karna ada orang yang bacarita sama om susupo, so ada pangkalan yang bacari untung lebeh, macam elpiji yang mustinya dijual 16 ribu satu tabung, so tajual sampe 20 ribu, padahal masih di dalam kota.
Kalu buat orang yang depe pandapatan stabil, nae 4 ribu te ada masalah, cuma buat orang-orang miskin, nae 4 ribu jelas ada depe pangaruh. Tagal itu, coba awasi juga ini pangkalan yang babajual elpiji 3 kilo, supaya jang cuma di papan pangkalan yang tatulis depe harga 16 ribu, padahal depe asli so dijual lebeh dari itu. Baru, tolong akan juga supaya ini gas elpiji jang susah didapat, karna orang-orang mo bamasak buat sahur deng kaparluan hari raya. Noh kalu gas susah dicari, akhirnya orang jengkel, kon depe ujung tantu repot...**
#om susupo #susupo #banggai raya
