Om susupo liat ini dekat-dekat hari raya, torang pe jalan raya so padat deng kandaraan. Noh bayangkan, jalan yang biasa te ada depe macet, skarang ini so macet. Yah, orang-orang bilang karna te ada yang tidor siang, samua kasana-kamari sibuk mancari. Kalu samua sibuk bagitu, om susupo pikir ini torang pe ekonomi tantu baputar, kon doi jadi tasebar kasana-kamari juga. Ini tantu bikin bagus putaran ekonomi. Cuma ada yang om susupo liat, rupa te talalo diperhatikan, macam soal balanggar aturan lalu lintas yang macam dikase biar. Yah, liat saja biar anak kacili kasana-kamari bawa motor, ada yang lalu lalang te pake helm, ada yang depe motor pake kanalpot baribut, ada yang babalap-balap parsis dorang itu pambalap. Om susupo liat biasa ada patugas yang bajaga, cuma rupa dikase biar itu orang-orang yang balanggar aturan kasana-kamari.
Om susupo pikir, mustinya biar lagi mo dekat-dekat hari raya, ini aturan lalu lintas juga tatap dijaga, kon kalu ada yang balanggar yah dikase tertib kon dikase sanksi. Karna macam anak-anak kacili yang baku-baku balap bawa motor di tengah jalan yang padat, kan kasian kalu sampe basenggol orang laen yang ada bajalan palan-palan. Yah, kalu yang bakandaraan sambarangan yang tasumpun, kase biar saja kasana. Cuma kan kasian kalu orang yang ba usaha tertib, baku ikot aturan, baru itu yang jadi korban. Mustinya, ini patugas tatap babikin tindakan tegas, kalu memang balanggar aturan, yah tilang, jang karna sibuk, atau karna mo hari raya, baru aturan bisa dilanggar...**
