Om susupo baca di koran kamarin, ini torang pe daerah mo jadi tuan rumahnya Hari Nusantara atau Harnus. Yah, kegiatan yang mungkin mo dihadirinya Presiden Jokowi itu, tantu nanti bisa babikin ini torang pe daerah makin terkenal. Bayangkan, ada barapa kegiatan yang mo dibikin, mulai dari pengobatan, parade kapal prang, parade parahu deng kapal hias,deng masih banyak lagi kegiatan laen. Om susupo dengar-dengar, mo ada juga pembagian sertifikat deng peresmian pabrik basaar sama torang pe daerah.Yah buat om susupo, itu kegiatan kalu jadi sama torang pe daerah, tantu bisa babikin ini perhatiannya pamarentah pusat sama torang pe daerah makin basaar. Kan ada banyak pajabat yang hadir, kon itu tantu diharap bisa badorong program buat taon-taon depan, apalagi kalu depe pamarentahan tasambung turuus. Ini kegiatan biar di Tangkiang yang maso Kabupaten Banggai, tapi tantu depe dampak diharap bisa tarasa di samua daerah tetangga.
Om susupo juga bapikir, karna ini mo ada kegiatannya angkatan laut, tantu jadi bagus, karna ada yang bisa diliat-liat, rupa parade kapal prang. Ini juga buat bakase liat sama torang samua, kalu torang pe TNI siap bajaga ini negara, siap bajaga samua rakyat, supaya pembangunan bajalan lancar. Kon buat ini yang biasa masih bakalakuan rupa babom-bom ikan, lebeh bae berenti kasian, jang nanti dikarbas, jang nanti dihukum, baru mo kalangkabut.
Om susupo sandiri baharap, ini patugas rupa angkatan laut, baku bantu bakarbas ini tukang kase rusak laut, rupa tukang bom ikan. Yah memang ini tukang kase rusak laut, biasa babasambunyi. Cuma carita soal itu masih ada, apalagi di daerah-daerah yang susah dijaganya patugas deng depe peralatan yang blum talalo mantap. Tagal itu, kalu memang mo karbas ini tukang kase rusak laut, rupa tukang bom ikan, samua kekuatan parlu baku bantu, terutama ini angkatan laut yang memang depe peralatan lengkap. Kalu parlu buat ini tukang bom ikan, jang kase ampun, tapi langsung bage deng mariam kasana depe kapal atau parahu, supaya dorang rasa-rasa.**
