Om susupo babaliat postingannya banyak orang, kalu barapa hari lalu atau pas tanggal 21 November, dirayakan jadi hari pohon sedunia. Om susupo pikir ini so bagus skali, karna itu hari pohon berarti dipake buat bakase ingat depe penting pohon buat torang pe kehidupan. Noh bayangkan sandiri, kalu pohon-pohon mulai sadikit, kan udara makin panas, daerah jadi gersang, kon akhirnya tanah te lagi basimpan aer.Cuma om susupo kadang sedih baliat ini torang pe pohon, karna ada yang kuat batanam, ada yang babasiram, tapi ada yang depe karja bakase rusak. Ada ini tukang bikin usaha yang rupa sambarangan, kon batempel dorang pe promosi di pohon, sampe ada yang dipaku di pohon. Ini orang rupa te ada otak, karna bukan dorang yang tanam pohon, kon sambarangan batempel dorang pe promosi di pohon.
Kalu om susupo boleh bakase saran, kalu ada perusahaan yang sambarangan bagitu, lebeh bae user saja dari sama torang pe daerah, karna depe karja cuma bakase rusak pohon. So te batanam, so te basiram, so te bapelihara, kon deng enteng bapaku-paku atau batempel promosi di pohon. Jang cuma depe gambar yang dikase kaluat, tapi depe perusahaan deng depe orang didatang akan, kon kase hukuman, kalu parlu user saja, supaya te bikin rusak pohon. Jang nanti ditogor, baru pura-pura mangaku te tau atau baminta maaf. Kan mustinya dorang so tau, itu pohon bukan buat tampat batempel promosi.
Ini juga om susupo mo kase ingat sama ini caleg-caleg, supaya jang kasian batempel promosi caleg di pohon. Kalu ada yang babagitu, mari torang kase rusak depe gambar, kon bilang sama orang-orang supaya jang bapilih yang babagitu, karna baru bacaleg saja so bakase rusak pohon. Tagal itu, jang kasian batempel apa-apa di pohon, karna itu pohon musti torang jaga sama-sama. ..**
