Om susupo bingung juga deng ini kabiasaannya orang tertentu, yang babalap liar, ba kase standing-standing motor rupa jago skali, tapi di jalan raya yang orang lewat-lewat akan. Macam yang om susupo baku temu akan barapa hari lalu di satu jalan di tengah kota, ada dua anak-anak yang baku bonceng, kon babawa motor pake bastanding, baru di tengah jalan rame. Yah, kalu dorang yang babalap liar sambil bagaya itu yang tasumpun, sampe patah kaki deng tangan, itu dorang pe urusan. Cuma yang kasian, kalu orang laen yang ada bajalan bae-bae, kon dapat senggolnya itu orang yang babawa motor kalangkabut.
Om susupo pernah badengar, ada yang babilang itu orang-orang lagi bacari jati diri. Ini pikiran kalangkabut juga, bacari jati diri itu babikin kegiatan positif, bukan bakalangkabut di jalan rame, karna bikin cilaka orang laen. Om susupo yakin, orang-orang normal kon bapake kandaraan bae-bae, juga te suka deng itu kalakuannya orang yang babawa motoro sambarangan. Kalu dorang tamalintuang kon baluka, itu dorang pe risiko, cuma bagimana deng orang laen yang ta ikot jadi korban.
Tagal itu, om susupo baharap skali supaya ini patugas rajin-rajin bapatroli, kon kalu ada yang babalap liar atau babawa motor kalangkabut, tahan saja depe motor sampe abis hari raya, supaya dorang te bikin kalangkabut orang laen yang sama-sama bapake jalan umum. Kalu boleh juga, ini orang-orang tua, coba awasi kasian depe anak-anak, supaya jang nanti baruju atau basenggol orang laen, baru ba alasan sagala rupa. Kalu memang blum cukup umur, jang dulu kase babawa kandaraan. Yang parlu diingat kasian, orang laen yang ta ikot jadi korban...**
