Mulai Senin kamarin, ternyata ini samua pagawe negeri so libur. Ebee, ternyata dorang pe libur panjang skali, karna skarang so libur, kon baru maso kantor tanggal 21 Juni kamari atau hari Kamis. Yah, biar so panjang, ada yang babilang rupa masih tagantong, karna mulai maso karja so hari Kamis, berarti karja cuma dua hari sampe Jumat, so baku riki deng Sabtu lagi. Depe arti so libur lagu. Cuma sebenarnya, ini so libur panjang, karna so amper dua minggu kalu dihitung dari hari Sabtu lalu. Tagal itu, om susupo cuma baharap supaya te ada lagi pagawe negeri yang babatambah libur, karna rakyat juga parlu pelayanan. Jang sampe, pas maso kantor abis hari raya, masih ada pagawe negeri yang batambah libur.
Ingat kasian, ini pelayanan urusan pamarentah deng urusannya rakyat parlu bajalan normal lagi abis hari raya, kon ini pagawe negeri so badapat sagala rupa selain gaji, mulai dari libur panjang, badapat THR atau gaji 14 sampe tunjangan kinerja. Kon abis hari raya, dorang somo batarima gaji 13 lagi.
Kalu pamarentah so kase itu sagala rupa, kon itu tunjangan-tunjangan bapake doi rakyat, tantu rakyat musti badapat pelayanan yang bagus, te ada lagi pelayanan yang kalangkabut, te ada lagi talambat urusannya rakyat, kon te ada lagi pagawe yang pamalas maso kantor deng pamalas balayani rakyat.
Yah, kalu masih ada pagawe yang babatambah libur abis libur panjang hari raya, lebeh bae kase hukuman baraat. Kalu cuma mo tapotong di tunjangan kinerja, om susupo rasa te talalo pangaruh buat dorang. Lebeh bae kase hukuman macam turun pangkat, dilapas dari jabatan atau sekalian suruh istirahat saja dari pagawe negeri...**
