Om susupo kamarin sempat baku temu deng satu orang, yang ada babilang depe keluhan soal beritanya koran yang dia ada bilang so talalo banyak bapuji. Om susupo batanya, koran yang mana itu deng berita-berita apa itu? Itu orang te bisa bakase penjelasan yang lengkap. Dia cuma babilang, te usah talalo banyak bapuji pamarentah.Ini yang om susupo bingung akan. Yang om susupo tau, karna om susupo banyak baku tamaan deng orang-orang koran, ini koran ada bakase sampe kabar soal apa karjanya pamarentah. Karna ini koran, selain bakase kabar soal kajadian, ada juga kabar yang depe sifat bakase informasi, rupa informasi pembangunan, mulai dari depe barencanakan sampe depe babikin. Ada juga kabar soal ba awasi atau orang-orang pande bilang, kabar yang takait deng sosial kontrol.
Noh selama ini, om susupo liat ini koran-koran so bakase kabar tentang samua itu, ada depe sosial kontrol, karna kalu ada yang te beres, kon ada depe data lengkap, dorang beritakan. Ada kabar soal kajadian rupa orang barmain sabu atau cap tikus yang ditangkap atau kandaraan yang cilaka, deng ada juga ada kabar soal informasi pembangunan.
Om susupo pikir, kalu memang ada soal kasus yang koran te muat, yah kase data sama itu koran, supaya dorang muat. Karna ini koran juga te bisa bamuat-muat sesuatu, kalu te ada depe data, deng te ada depe nara sumber yang jelas.
Yah, kalu soal informasi rupa pembangunan, kadang ada yang lupa, ini tugasnya koran kan memang bakase informasi apa saja, selama itu informasi butul-butul ada. Rupa pembangunan, rupa kegiatannya pajabat, kalu memang itu kajadian ada deng depe informasi butul-butul ada, kan musti dikase kabar sama samua orang. Ini kabar yang babagini, bukan buat bapuji-puji, tapi buat bakase informasi sama rakyat, soal apa-apa karjanya pamarentah. Om susupo masih yakin, te mungkin koran bamuat informasi pembangunan atau kegiatan, kalu itu pembangunan deng kegiatan te ada.
Cuma yah, kalu ada yang te puas deng beritanya koran, om susupo pikir itu juga wajar, karna koran memang bukan batugas buat bakase puas samua orang. Kalu memang ada yang te suka sama pamarentah atau pajabat pamarentah, jang juga mo baku pangge koran buat baku ikot deng itu model. Karna om susupo tau, itu koran bakarja independen, kon dia cuma bakase kabar apa yang butul-butul ada depe kajadian, bukan apa yang mo dikarang-karang. Cuma tantu so itu, mo bagimanapun, bukan koran pe tugas buat bakase puas samua orang pe mau...**
