Om susupo so barapa kali babaca berita, rupa ini urusan penertiban di Pasar Simpong blum kalar-kalaar. Yah, memang ba urus yang takait deng orang banyak, pasti depe susah minta ampun. Noh bayangkan, ini yang diurus panjual yang macam-macam, deng dorang pe latar belakang juga yang beda-beda. Tagal itu, parlu waktu panjang buat ba urus penertiban. Om susupo sandiri bisa mangarti kalu itu urusan bakase tertib memang parlu waktu panjang deng tingkat kesabarannya patugas yang so level dewa.Cuma om susupo juga mo kase ingat, supaya ini patugas juga bisa tertib. Kalu di tampat-tampat yang so abis dikase tertib, yah musti dilarang karaas, supaya jang ada lagi panjual yang bale-bale ka lokasi yang so dilarang, rupa jalan di pinggir pante. Mo panjual yang babikin lapak, atau panjual yang cuma pake alas atau pegang loyang deng ember, tatap te boleh, supaya jadi contoh buat samua, kalu itu tampat memang buat panjual.
Ini yang om susupo liat ini patugas blum talalo tegas. Karna om susupo masih baliat, ada panjual yang masih bajual di jambatan, ada yang bapake jalan, kandati memang cuma pake loyang atau ember kon baduduk di pinggir jalan atau jambatan. Cuma tatap saja, karna ada yang bagitu, akhirnya yang laen baku-baku ikot. Noh ini kalu dikase biar turuus, lama-lama yang laen bisa baku ikot.
Tagal itu, ini patugas musti tegas, supaya jang ada lagi panjual, deng alasan apapun, buat bajual di jalan pinggir pante atau bapake jambatan. Karna om susupo sandiri liat, karna masih ada yang bajual di pinggir jalan pante deng jambatan, akhirnya itu jalan tatap rupa susah mo dilewat akannya oto. Kon buat ini panjual, om susupo juga baharap, bisa baku mangarti, supaya te lagi bajual di pinggir jalan atau jambatan, supaya itu kandaraan bisa lewat bagus. Yah, macam yang bajual ikan, kan so ada depe tampat. Bagitu juga deng jenis jualan yang laen. Ini urusan yang bagini parlu dikase tegas, supaya jang masalah yang sama, itu turus yang mo diurus kasian. Samua mustinya bapikir, supaya torang bakase tertib torang pe pasar...**
