Om susupo dengar-dengar, so ada barapa desa yang depe pajabat tagate deng kasus hukum. Yah, ada yang karna salah urus doi desa yang basaar, ada yang tasalah pake, ada yang te tabikin depe pakarjaan padahal doi tapake, kon ada yang juga so kalangabut.Noh skarang ini, desa-desa di kampungnya om susupo so batarima di atasnya satu miliar samua. Ada barapa yang juga so sampe dua miliar. Noh bayangkan sandiri, kalu doi miliar kon taputar-putar di desa, tantu sadaap skali kadengaran.
Cuma so itu, buat bakase maju desa, bukan cuma soal depe jumlah doi yang banyak, tapi yang paling penting depe cara bapake deng depe cara batanggungjawab. Kan ini doi desa, doinya rakyat juga. Tagal itu, musti bisa dipertanggungjawabkan sama rakyat.
So di sini depe penting itu urusan dibikin terbuka. Karna ini bapake deng babikin apa-apa di desa kon pake doi dana desa, memang musti terbuka. Te boleh ada kegiatan yang pake-pake rahasia, apalagi so urusan doi desa, kon mo dikase rahasia sama rakyat. Ini doi desa, depe tuan rakyat. Tagal itu, rakyat musti tau, apa-apa yang pamarentah desa bikin, barapa-barapa depe doi, buat apa itu kegiatan, kon bagimana depe hasil? Jang ada pamarentah desa yang bapikir, ini urusan doi desa cuma urusannya pamarentah desa. Karna ini doi desa dikase turunnya pamarentah, buat bakase bagus kahidupannya rakyat di desa, buat bakase maju desa. Jadi, rakyat di desa musti tau samua, apa-apa yang mo dibikin, kon bagimana depe urusan tanggungjawab itu kegiatan deng depe doi.
Om susupo cuma bakase ingat, supaya ini pamarentah desa pe bajalan gagah, dorang musti terbuka ba urus itu doi desa, jang ada yang dibikin jadi rahasia, jang ada yang ditutup-tutup. Kan pasti enak, kalu pamarentah desa terbuka, karna rakyat pasti jadi tau, kon te ada baku-baku tuduh atau baku-baku lapor...**
