Ujan satu hari pas Selasa lalu, ternyata so babikin ini barapa tampat sama torang pe kabupaten so banjir. Cuma kalu om susupo baca-baca itu berita di koran, rupa itu tampat yang banjir depe lokasi yang so amper-amper sama tiap taon. Macam di Desa Minangandala di Masama sana atau barapa desa di Toili deng Moilong.
Memang banjir itu bencana, cuma barangkali, bencana yang bisa diatasi, kalu samua orang butul-butul bakase perhatian. Buat ini rakyat, yah kalu bisa jang bakase rusak hutan, kon kuala parlu dijaga, supaya te rusak depe alur. Buat ini pamarentah, barangkali parlu babikin data kuala-kuala yang biasa depe aer meluap kon babikin banjir, supaya abis itu bisa dibikin program ba atasi banjir.
Ini program ba atasi banjir bukan deng cara bapele aer yang so banyak, tapi babikin supaya itu hutan tatap bagus, supaya itu kuala tatap normal depe aliran aer. Yah, macam program banormalisasi kuala, depe tanah digale ulang supaya dolom lagi, kon depe pinggir-pinggir di tanggul, supaya te runtuh atau longsor.
Cuma memang ini program musti serius. Yah, kalu so ada depe data, kan pas musrenbang bisa didorong, supaya jang tiap-tiap taon ini rumah, masjid, koboon deng sawah tatono aer yang meluap. Kan kasian juga, kalu tiap ujan basaar skali, rumah-rumahnya orang deng dorang pe tampat mancari, tatono aer, akhirnya dorang pe tanaman juga rusak. Coba pamarentah, urus kasian itu yang babagitu, karna om susupo masih yakin, banjir bisa diatasi. Beda deng bencana macam tanah goyang atau gunung meletus, yang memang te mungkin mo ditangkis...**
