Barapa hari lalu, om susupo babaca di koran, torang pe pak bupati ada batarima lagi penghargaan. Penghargaan yang terakhir katanya, soal ini usahanya pamarentah babikin aturan soal kawasan tanpa rokok atau tampat-tampat yang te boleh dibarokok akan. Yah, om susupo stuju deng itu. Apalagi dari caritanya orang-orang yang so kasana-kamari di kota basaar, di kota-kota itu so banyak skali tampat yang dilarang barokok akan, macam di gedung-gedung, hotel restoran, sampe terminal deng palabuhan. Kon kalu ada yang kadapatan, kana denda. Om susupo pikir, ini parlu torang terapkan sama torang pe daerah. Yah, bukan buat balarang orang barokok, karna om susupo juga suka barokok, kandati kadang cuma baminta sama tamaan. Cuma itu aturan memang parlu ada, supaya ada tampat yang boleh barokok akan, deng ada tampat yang sama skali te boleh barokok akan. Macam di kantor-kantor pamarentah, tampat umum macam rumah sakit, tampatnya orang ba antri, ruang tunggu terminal atau palabuhan, so parlu di bikin jadi tampat yang te boleh barokok akan.
Cuma sarta so dibikin itu tampat barokok, ini patugas pamarentah juga parlu turun tangan bapantau deng bakase jalan itu aturan, supaya orang ikot, orang patuh, deng te ada yang balanggar. Noh om susupo sandiri kuat baliat, ada yang deng enteng babuang puntung sambarangan, padahal ada tampat sampah yang dekat, ada yang barokok dekatnya anak kacili, akhirnya itu anak kacili bapikir, oh ini barokok boleh. Tagal itu, om susupo stuju kalu ini aturan soal barokok memang parlu dibikin, dikase ketat, kon dijalankan, baru diawasi, lengkap deng depe hukuman, supaya orang te barokok sambarangan, depe asap te sambarangan kasana kamari, deng depe puntung te tahambur di samua tampat. Yah, kalu blum bisa barokok deng tertib, barokok deng aturan, lebeh bae te usah barokok. Jang sampe ada yang babilang, so rokok cuma diminta atau babili eceran, kon babuang puntung sambarangan...**
